الليل سادة

الليل سادة، والطواريق مُرّة

والحلم حالي، بس ماله مواري

إحساسي اللي لو بقى منه ذرَة

والله ما تذري عليها الذواري

والجرح أبرا منه، واحيان ابرّه

وان مابرى، او مابراني، مباري

ان ماسمعت لناي الاوجاع جَرّه

في داخله تجري علينا الجواري

الليل سادة، والطواريق مُرّة

والحلم حالي، بس ماله مواري

واللي نشد عن وجد قلبي وسرّه

خذوه معهم يمّ هاك المحاري

البعد هذا، يكفي الله شرّه

غريب وعيون المقفّي دياري

لا جيت اعاتب بالهوى واتشرّه

ولا رحت اباخذ بالغيابات ثاري

لله درّ الصمت لله درّه

مابه حسايف لو جروحه ضواري

الليل سادة، والطواريق مُرّة

والحلم حالي، بس ماله مواري

لا ضيقةٍ تكسف عيون المسرّة

ولا عتيمٍ تقتفيه (المساري)

قلبي لاهو بارد، ولا فيه حرّة

وبالي خليّ من العَسس والطواري

هذي سواحل راكد الدمع، مُرّه

يوم اجحفت في حقَ اهلها العباري

تسري رجاوينا على حين غرّة

والحرّ ما يبلش بصيد الحباري

الليل سادة، والطواريق مُرّة

والحلم حالي، بس ماله مواري

الليل سادة