Базар

Аб\'ява

Разгорнуты лісток

Бяросты

Павешан на сучок

Бярозы.

Чакайце,

Гэта ж аб\'ява;

Чытайце

Злева направа.

Чытайце

Выразна, услых,

Слоў не глытайце

Вялікіх, малых.

Значыць, аб\'ява?

Цікава.

Дзе пажар?

Падняліся, паляцелі

Усе, хто крылы мае.

Зашумелі, загудзелі,

Гоман не змаўкае.

– Дзе пажар?

Дзе пажар?

– Не пажар,

А базар.

– Недалёка, недалёка! –

Абвяшчае ўсім сарока.

Глядзіць падазрона

Сівая варона:

– Можа на хвасце ты

Слых прынесла гэты?

– Не, на самай справе –

Сказана ў аб\'яве.

\"\"Толькі б не спазніцца\"\", –

Думае сініца.

Драч бяжыць з-за купін.

– Штосьці купім,

Штосьці купім.

Нават муха і камар

Паляцелі на базар.

Вераб\'ёва прамова

А базар – як стадыён.

Птушак, пэўна, тут мільён.

Дзе бярозкі –

Там кіёскі,

Дзе дубочкі –

Там ларочкі.

Над павільёнамі –

Сосны з парасонамі.

На трыбуне верабей

Слова мае да гасцей:

– Чык-чырык,

Свет вялік.

У добрай згодзе

Мы жывём,

У лагодзе

Гнёзды ўём.

Нашы – нівы, нашы стрэхі,

Нашы плёсы, нашы рэкі

І крутыя берагі,

І балоты, і лугі.

Добра жыць, добра жыць,

Ёсць што есці, ёсць што піць.

А цяпер святочным днём

І базар мы свой пачнём.