Godzilla

‘Nu mostro

cu tre cape e treciento code

ca distruggeva e sputava ‘o 'ffuoco

preta dint’ ’a scarpa po’ addiventaje

pe’ chesta umanità….

Nascette,

in una base in zona spaziale

figlio 'e ‘nu ‘nciarmo molecolare

ma d’ ’a natura ‘e parti pigliaje

pronto a se vendicà…

Cannune,

missili atomici a beverune

ma po’ nell’aria a ‘ngopp’ ’e tetti

‘na musica po’ se sentette

“Ue, chedè sta melodia

ca scenne ‘nmiezo ‘a via

e fa addiventà sciure ‘e spari d’ ’e surdate

Ah, e tu bestia cattiva

feroce e radioattiva

addiventaste amica cu sti carrarmati

ca fra piezz’ ’e marmo, cumuli e macerie

te cunsignajeno bombe e cattiveria

a mana smerza

p’ ’a strana concezione ‘e l’omme

'e sparà a chi è diverso”.

Pazziava,

cu’ cientomila criature ‘nguollo

catene ‘e nave p’ ’attuorno ‘o cuollo

‘a bestia ca ce pigliaje pe’ preda

addiventaje mansueta.

Nisciuno,

capette ‘bbuono ch’era succies'

ma per l’esercito fuje ‘n’offesa

ca ‘na canzone sunata doce

purtaje speranza e quiete.

E ancora,

mo che ha girato parecchie vote

‘o munno tene dint’ ’e recchie

chi chella vota po’ dicette:

“Ue, chedè sta melodia

ca scenne ‘nmiezo ‘a via

e fa addiventà sciure ‘e spari d’ ’e surdate

Ah, e tu bestia cattiva

feroce e radioattiva

addiventaste amica cu sti carrarmati

ca fra piezz’ ’e marmo, cumuli e macerie

te cunsignajeno bombe e cattiveria

a mana smerza

p’ ’a strana concezione ‘e l’omme

'e sparà a chi è diverso”.