Traiectum

Doen die ongherechte,

Die waren des viants knechte,

Des waren woerden in eyn,

Der enghel sinte Seruaes erscheyn.

Hij geboet den heilighen manne

Dat hi voer van danne

All daer hij noch is, te Triecht.

In eynen dall scoen ende liecht.

Effen ende wael ghedaen,

Daer twee water tsamen gaen.

Eyn groot ende eyn cleyne,

Claer, schoen ende reyne:

Dats die Jeker ende die Mase.

Beide te korne ende te grase

Es die stadt wale gheleghen,

Ende te schepen in voele weghen;

In visschen ende in ghewilden

Ende in goeden ghevylden

Der bester coren eerden

Die ye mochte ghewerden.

Des steyt die stat te maten

Aen eynre ghemeynre straten.

Van Inghelant in Ongheren

Voer Colne ende voer Tongheren;

Ende alsoe dies ghelijck,

Van Sassen in Vrancrijck

Ende mit scepen die des pleghen,

Te Denemerken ende te Norweghen.

Die weghe versamenen sich all dae.

Des is die stadt daer nae

Gheheiten Traiectum.

Daer sande God Servacium.