ស្ម័គ្រមួយជីវិត

វាយោត្រជាក់ ធ្លាក់មកពីឆ្ងាយ

ទឹកហូរអន្លាយ ហូរទៅសែនឆ្ងាយសន្លឹម

តន្ត្រីធម្មជាតិ ឆ្លៀតថ្ងូរគ្រហឹម

ដួងចន្ទរះប៉ប្រិម ហាក់ប្រឹងញញឹមរកស្រី

អូននៅចាំបង នួនល្អងឆ្នើមចិត្ត

អារម្មណ៍អូនគិត ខ្លាចបងស្នេហ៍តែសម្ដី

ខ្លួនអូនក្រមុំ ក្រពុំពេញវ័យ

សូមផ្ញើចិត្តភក្ដី ស្ម័គ្រស្មោះលើថ្លៃតែមួយ

បារម្ភថ្វី ស្រស់ស្រីបណ្ដូលជីវិត?

បងមិនក្បត់ចិត្ត ពិតជាមិនឱ្យស្រីព្រួយ

បងថ្នមមាសស្នេហ៍ បងថែជាពន្លកត្រួយ

ចិត្តស្មោះតែមួយ កុំព្រួយថាបងមានថ្មី

ទឹកដីព្រៃខ្យល់ យល់ហើយជួយចាំ

សូមជួយចំណាំ បណ្ដាំទុកជាសាក្សី

ចិត្តយើងនៅស្មោះ លុះគ្រាក្សិណក្ស័យ

បើកើតជាតិជាថ្មី ប្រាថ្នាសូមជួបម្ដងទៀត