منو اني

اذكرچ لو صدگ گلبچ نساني

منو آني نسيتي منو آني

انا الضويتلچ دربچ بالنجوم

زرعت احلام عمرچ بين الغيوم

كتبت دموعچ و صارن اغاني

منو آني نسيتي منو آني

انا الماغمضت بفراگچ العين

على ايدي بس چنتي تنامين

عمر غطيتچ بحبي و حناني

منو آني نسيتي منو آني

انا الضميت رسمچ بين العيون

و انا السويتچ احلى بنية بالكون

مثل حبي الچ ما يحب ثاني

منو آني نسيتي منو آني

انا السويتلچ كلشي آني سويت

على جسمچ اثر لأحضاني خليت

و هسة يا حضن صار بمكاني

منو آني نسيتي منو آني

انا چنت الضوة لعيونچ انتي

متشوفين بس بعيني شفتي

و اخذ حبچ ضوة عيوني و عماني

منو آني نسيتي منو آني

انا الي دللت ونطيتچ الروح

و اگول انتي الحبيبة وين ماروح

و گلبي يذكرچ وگلبچ نساني

منو آني نسيتي منو آني