回甘

下晡 涼涼的風

帶狗仔佇海邊曝日頭

戶頭賰幾圓 貸款猶愛納幾年

佇這時攏親像是海風吹過去

小可仔黏黏 小可仔鹹鹹

生活的苦澀若茶 那啖咧啖咧那回甘

人生的路途 若有你陪佇阮的身邊

行到佗位攏順路

黃昏 綿綿的日頭

帶狗仔佇河邊散步

一年過一年又一年

三隻變兩隻 即馬

河慢慢流

人連鞭老

好䆀有時 生死有時

我坐佇遮 你敢會佇邊仔

生活的苦澀像茶

那啖咧啖咧那回甘

人生的路途 若有你陪佇阮的身邊

行到佗位 攏順路

停蹛佗 攏拄好