حبيبت ابوها

يحميكي يا بنتي من العين محروسة والله وكبرتي وبقيتي عروسة يا كريز متنقي، يا حتة بسبوسة يا بنوتة قلبي، يا أجمل ننوسة حبيبة أبوها أهي يا جدعان وردة وطرحت في البستان خمسة عليها وع اللي يشوفها وما يصليش ع النبي غيران من فرحتي مش لاقي كلام في جمال كده معقول يا سلام قمر 14 يا حبيبتي حلو عليكي أوي الفستان أمورة بابا، عصفورة بيتنا يا بحر طيابة مغرق دنيتنا يا أجمل سنيورة، يا قمر حتتنا من يوم ما أنستي وكملت فرحتنا عندي أميرة في بيتي يا ناس كوكتيل رقة على إحساس شعرها غزل بنات والله خدها ورد عايز ينباس بصة في عينها تحلي الكون قصاد ضحكتها الدنيا تهون لأ وعليها دلع يا خرابي بتنسيني هموم اليوم يا هناه ويا سعده اللي هيبقى حبيبك وهتبقى عروسته ويجي يطلب إيديك أطلع عين أهله وعينيه عشان أسيبك سامحيني ما أنا برضو تعبت في تربيتك أنا بنتي أميرة الأميرات وجميلة جمال الملكات حاجة كده من اللي بتسمع عنها في الحواديت وفي الحكايات يا رب تعيشي في هنا وآمان وأشوفك أسعد واحدة كمان واللي بتحلمي بيه يتحقق وأشوف قلبك دايمًا فرحان