كله من غيابك

هذا كله من غيابك انقتل فيني الحنين

علم غيابك شعوري كيف اعيش بلا شعور

كنت ماضي وانتهى لي واندثر بين السنين

واشعر انك في حضورك مالك بعيني حضور

 

كان في الماضي مكانك بين قلب وبين عين

قبل ما يصبح مكاني بين ظلم وبين جور

نظرتك فيها انكسار ودمعتك فيها انين

اختفت فيها قساتك واندفن فيها الغرور

 

حتى هالدمعة بعيونك لو بتنزل ما تبين

مالك لقلبي طريق ومالك لحسي عبور

مستحيل اني أحن وليتني أقدر الين

عزة الجرح اللي فيني ما بتهدى لو تثور

 

ما أظن بيوم ابنسى لجل خاطر كلمتين

وانا كاتب من عذابك واللي شفته في سطور

وانا آسف راح تبقى قصة من ماضي حزين

قصة ما للحب فيها في وجودك أي ظهور

 

كنت انادي وادعي ربي يالله في عيني تزين

واطلب الله بعد ظلما هالفراق يشع نور

لا وربي لا إنتقام ولا اعتبرته رد دين

وربي يعلم مو شماته والله أعلم بالصدور