ឆ្អាបបងមែនទេ?

I-អូនខ្ពើមរអើម...លែងចង់ក្បែរបង

ប្រើពាក្យដាក់បង ធ្ងន់ៗដៀលបងកប់ក្ដោង

ឆ្លុះកញ្ចក់ផង កុំមកទាមតោង

ប្រមាណខ្លួនផង ស្គាល់មួកស្គាល់ម្កុដ។

II-អូនឆ្អាបអូនឆ្អើម ...ខ្ពើមបងដល់ម្លឹង

ពីមុនព្រលឹង ជ្រក់ទ្រូងបងសុខបំផុត

ឱបបងពេញដៃ គ្មានថ្ងៃអូនក្បត់

ពេលនេះបងស្លុត អូនហាមាត់ខ្ពើមបង។

R-បងដូចស្រកី ត្រីស្រីឆ្កឹះចោល

តាមពិតនិមល ទុកបងត្រឹមទូកចម្លង

ជាឈ្នាន់មាសមេ ជួបគេអូនទាត់ចោលបង

មិនអាសូរផង បងធ្លាប់ធ្វើល្អ។

III-ត្រឹមអ្នកធ្វើត្រី...ដៃជាប់ស្រកា

អូនបោះពាក្យថា ជីវ៉ាមិនអាចបន្ត

ប្រាណបងឆ្អាបត្រី ស្រីឆ្អាបភាពក្រ

មានចិត្តស្មោះសរ ដូរបានទឹកភ្នែក ៕