تعسفني عيونك

تحرقني البسمه ويذبحني الخوف

وأضيع كلي لا ناظرتك بعيني

تخنقني العبره وتجبرني ظروف

وأموت لا شفتك غلا يحتويني

تعشقني الحيره ويتعبني الشوف

وأقوم أصفق بالشمال اليميني

تأسرني الكلمه وتجرحني حروف

كأن السما ورعودها تعتريني

تكويني الدمعه ويكويني الجوف

وأصد أخفي دمعتي لاتبيني

تمنعني الشيمه ولو كنت ملهوف

ما أذلها نفسي ولو تقتليني

تبحر بي النظره ويشقيني الطوف

وأصيح وأنخى يا مرابع سنيني

تعسفني عيونك ونظراتها نوف

وأعض من وجدي أصابع يديني

تسرقني النخوه بدنياي ما أشوف

غيرك فلا غيرك بعيني يزيني