אליך ה' נשאתי עיניי / שעריך בדפקי יה פתחה

הֲדָרְךָ לֹא יְכִילוּן מַלְאֲכֵי רוּם וְעַל אַחַת אֲנִי כַּמָּה וְכַמָּה

הֱטִיבוֹתָ וְהִגְדַּלְתָּ חֲסָדִים לְךָ תַּגְדִּיל לְהוֹדוֹת כֹּל נְשָׁמָה

אֵלֶיךָ ה' נָשָׂאתִי עֵינַי

שְׁמַע קוֹל תַּחֲנוּנַי כְּגֹדֶל חַסְדֶּךָ

בְּשִׁמְךָ בָטַחְתִּי וְכַפַּי שִׁטַּחְתִּי

דְּבָרִים לָקַחְתִּי וּבָאתִי עָדֶיךָ

גָּבְרוּ יְגוֹנוֹתַי וַיִּרְבּוּ אַנְחוֹתַי

כִּי כָל עֲוֹנוֹתַי שַׁתָּה לְנֶגְדֶּךָ

דָּלְפָה מִתּוּגָה נַפְשִׁי הָעֲנוּגָה

וְחַלֵּץ מִדְּאָגָה נֶפֶשׁ עַבְדֶּךָ

הַעֲבֵר חַטָּאתִי אֱלֹהֵי יְשׁוּעָתִי

וְגַם אֶת דִּמְעָתִי שִׂימָה בְּנֹאדֶךָ

שַׁדַּי נִשְׂגַּבְתָּ בְּכָל אֲשֶׁר פָּעַלְתָּ

כִּי צַדִּיק אַתָּה וְצֶדֶק מַדֶּיךָ

תְּכַפֵּר עֲוֹנִי כִּי שִׂבְרִי בְּךָ מַלְכִּי

וְכוֹנֵן אֶת דַּרְכִּי אֱלֹהַי לְעָבְדֶּךָ

תִּשְׁעֶה לִתְפִלָּתִי וּלְשִׂיחַ רִנָּתִי

כִּי אַתָּה תִקְוָתִי וּמִי לֹא יְעִידֶךָ

שְׁעָרֶיךָ בְּדָפְְקִי יָהּ פְּתָחָה / וְיוֹם אֶעְטֹף כְּשׁוֹאֵל יָד שְׁלָחָה

לְךָ תָבוֹא תְפִלָּתִי וְשַׁוְעִי / מְקוֹם כֶּבֶשׂ וְעִשָּׂרוֹן וּמִנְחָה

מְאוֹר עֵינַי נְצֹר וּשְׁמֹר לְשׁוֹנִי / וְאִם אֶשְׁגֶּה לְפָנֶיךָ סְלָחָה

הֲרִימוֹתִי לְךָ לִבִּי וְעֵינַי / נְטֵה אֹזֶן וְגַם עַיִן פְּקָחָה