Яңа рәхәтлек

Алтын көзләр үтте,

көмеш кышлар җитми –

аралыкта яшим әле мин.

Бар да элеккечә,

ә каядыр күчәм...

Аңлый алмыйм әле хәлемне.

Борчуларны куам,

йөрәктә җыр туа –

эчтән генә җырлап җибәрәм...

Алланың рәхмәте –

яңа бер рәхәтлек

дөньясында йөзәм иркенләп,

дөньясында йөзәм иркенләп.

Көз гөлләре исән,

яз җилләре исә –

күңелдәге моңны җилгәрә.

Офыгым аллана,

һавалар баллана,

мәгънә табам туган һәр көннән.

Борчуларны куам,

йөрәктә җыр туа –

эчтән генә җырлап җибәрәм...

Алланың рәхмәте –

яңа бер рәхәтлек

дөньясында йөзәм иркенләп,

дөньясында йөзәм иркенләп.