à l'umanu

À l’umanu

À l’umanu

Chì scava è scava sempre à stentu cutidianu

U campu fruttiferu da u sperà

À e cità chì campanu è tornanu à campà

À e mani chì danu

À l’ochji chì s’aprenu

À e crucere di i sogni

À i passaporti di l’amicizia

Chì leia è rilleia

Stringhje è abbraccia

D’un eternu sfocu

L’affollu canterinu di i populi

À a lingua di i pueti

À i zitelli chì nascenu

Apposta

À quelli chì

Vuluntarii di l’esiste

Credenu sempre è credenu listessu

À avveni più belli

À i riturnelli di l’arburi sott’à u ventu

À e ciccone di a mo giuventù

Offru u mo cantu d’omu appaciatu

U sguardu di e stagioni u miraculu di vive

I mo ghjorni felici sulcati di culombe

L’attesa impacente di i nostri figlioli

Ricordu di u futuru prumessa d’un’antra età

Sciappendu e catene nude di e vechje schjavitù