Comment qu'a moy lonteinne
Soies dame d'onnour
Si m'estres vous procheine
Par penser nuit et jour.
Car souvenir me meinne
Si qu'ades sans sejour
Vo biaute souvereinne
Vo gracieus atour.
Vo maniere certeinne
Et vo fresche coulour
Qui n'est pale ne veinne
Voy toudis sans sejoour.
Comment qu'a moy lonteinne
Soies dame d'onnour
Si m'estres vous procheine
Par penser nuit et jour.
Dame de grace pleinne
Mais vo haute valour
Vo bonté souvereinne
Et vo fine douçour.
En vostre dous demainne
M'ont si mis que m'amour
Sans pensee vilainne
Meint en vous que j'aour.
Comment qu'a moy lonteinne
Soies dame d'onnour
Si m'estres vous procheine
Par penser nuit et jour.
Mais desirs qui se peinne
D'acroistre mon labour
Tenra mon cuer en peinne
Et de mort en paour.
Se Dieus l'eure n'amainne
Qu'avous qui estes flour
De toute flour mandainne
Face tost mon retour.
Comment qu'a moy lonteinne
Soies dame d'onnour
Si m'estres vous procheine
Par penser nuit et jour.
