من دير عنّايا المشهور (عربي)

مِن دَير عِنَّايا المَشْهُورْ

شَرْبِلْ ضَوَّى سْراجِ النُّورْ

وِالبِيعَهْ بكِلِّ المَعْمُورْ بِتْصَلِّي وِبْتِتْمَنَّى

يا شَرْبِلْ صَلِّي عَنَّا!

يا راهِب عَ هالتَّلِّه

بْمَحْبِسْتَكْ عَمْ بِتْصَلِّي

وْمِن قَلْبِ الفَادي تْمَلِّي مْحَبِّه وطُهْرِ وتِتْهنَّى

يا شَرْبِلْ صَلّيِ عَنَّا!

وهالأرضِ اللّي حَبَّيتا فْلَحْتَا زْرَعْتَا وْسَاوَيتَا

ومِنْ دَمّ قَلْبَكْ رَوَّيْتَا تْراباتَا عَمْ تِتْغَنَّا

يا شَرْبِلْ صَلِّي عَنَّا!

إنسانْ كامِلْ خَيّ الكِلّْ مَجْبُول مْحَبِّه عَ الحِلّ

خَلِّينا نِحْنا و الكِلّْ بِالأخُوِّه نِتْكَنَّى

يا شَرْبِلْ صَلِّي عَنَّا!

قِدِّيسْ كِلَّكْ لأللّه حَيَّرْتِ الدِّنْيِي كِلاَّ

عَنْ أرْضَكْ لا تِتْخَلَّى يا قِدَّيسِ المِنْ عِنَّا

يا شَرْبِلْ صَلّيِ عَنَّا!

لبنان هالأرزِه الخَضْرَا عِنْدُو شَرْبِل والعَدْرَا

يا شَرْبِلْ مِنَّك نَظْرَا عَ لبنان وْطَمِّنَّا

يا شَرْبِلْ صَلِّي عَنَّا!

ببقاعكفرا كنت صغير تحب الاستحباس كتير

وتصلي تا تصير كبير وتحقق شو بتتمنّى

يا شَرْبِلْ صَلِّي عَنَّا!

يومية بقربان وكاس تلاقي ربّك بالقدّاس

وتصلّي عن كل الناس ونعمه وبركه تدينَّا

يا شَرْبِلْ صَلِّي عَنَّا!

جيناك يا شربل تَ نزور ومن قبرك تعطينا نور

وندور مع زيت وبخُّور ونعمه من قلبك بدنا

يا شَرْبِلْ صَلّي عَنَّا!

يا مار شربل بديارك طُلّ وبارك زوَّارك

زوِّدنا من أنوارك ورافقنا وين ما كنّا

يا شَرْبِلْ صَلِّي عَنَّا!

مِن دَير عِنَّايا المَشْهُورْ شَرْبِلْ ضَوَّى سْراجِ النُّورْ

وِالبِيعَهْ بكِلِّ المَعْمُورْ بِتْصَلِّي وِبْتِتْمَنَّى

يا شَرْبِلْ صَلِّي عَنَّا!