دهاة عتيبة

سرى الليل فوق اللي مايحسب حساب الميل

يقرّب بعيدات الديار النحاوية

واخذت الطريق اللي يباري طريق السيل

اسابق ذعاذيع الرياح الشمالية

الي لازمٍ مايقبل العذر والتأجيل

ومنصاي شيخٍ له مكانة وجاهية

لو الجو ماهو جو سجة وحط وشيل

عسى لاهب الكنّة فدا المربعانية

متى خالد الزعاق يعلن طلوع سهيل

وتتبدل الاجواء بـ الاجواء الربيعية

انا من محبين الشتاء والمطر والسيل

وأحس الشتاء معنى الحياة الطبيعية

يشوّقني البراق وأحب مسرى الليل

وتوجعني انقاض الرسوم الطلالية

وأحب امدح اللي سيرته مثل ريح الهيل

أبو وقفةٍ عند الأمور الضرورية

هذا رده الحدمان شيخٍ قويٍ حيل

وركنٍ من الحدمان ياحي طاريه

ما دوّر عن اللازم مخارج ولا تحويل

ليا من نخيته فزعته غير عادية

هذا شيخٍ تنومس فعوله ووافي كيل

زهته المراجل والصفات المثالية

تشيل الحمول جمال ماهي جمال اعقيل

 و رده عزومه للثقيلة رهاوية

يقلط صحون الحشو معها سمان الحيل

على المجلس اللي فيه نار الكرم حية

لو إن الكرم هذا الزمان اغلبه تمثيل

هذا الجود فيه من الصفات الوراثية

يا رده يابن مشعان لك فايق التبجيل

مقاطيٍ مردد والافعال حصرية

سليل الدهاة اللي ما عاشوا على التظليل

مذاخير عارف بالفعول البطولية

وجنبه عياله محزمه من خيار الجيل

قروم العيال اللي على نهجه وزيه

من اللابة اللي مجدهم فـ الزمان مهيل

زحولٍ لهم صيت و مكانة ريادية

الاد الهديبي عزوةٍ ماتبي تطبيل

وتاريخهم فوق النجوم السماوية

على سلمهم دايم ولا بدلوا تبديل

هل الفعل الابلج فـ الامور المصيرية

من عتابة الهيلا دهاةٍ تعدل الميل

كبار المقام اهل الفعول الكبارية

ليا ثار عج الخيل نخلي حمول الخيل

ولا ناخذ الا اهل البشوت القيادية

نجي للمعارك مثل جيت هل التكميل

ولا نعطي الموت الحمر ذات اهمية

مضارب يمانينا ماهي تقبل التعديل

ليا ثوّر البارود في ساعة الهية

وعند العطايا مدنا اطلق من التمويل

ولا نلحقه منة ولا نلحقه سية

وعند التحدي من تحدى يشوف الويل

نقف دون الاول بالعزوم الحديدية