ល្ងង់នៅកែវភ្នែកអូន

I ល្ងង់ក្នុងភ្នែកអូន ដឹងហើយថាស្ងួនរូបអូនក្បត់បង

លួចលាក់ក្បត់ពីក្រោយខ្នង ទុកឲ្យបងក្លាយជាមនុស្សល្ងង់

បើសិនចង់ទៅ ហេតុអ្វីមិនប្រាប់ត្រង់ៗ

ទូកចេញសល់តែកំពង់ មនុស្សល្ងង់ មិនដឹងខ្លួនខុស។

II ស្រីលង់ទឹកប្រាក់ ស្លឹកបាស់វាឡើងផុតទ្រើង

កុំចង់បានរងើកនិងចំបើង ចរិតផ្គើនគង់ដឹងកំហុស

ពីមួយទៅមួយថ្ងៃមុខ គង់តែសុសអស់

អាស្រូវគ្មានសល់កេរ្តិ៍ឈ្មោះ សាងកំហុសដោយកាមលោកិយ។

R ខំយំខំស្រែក ទឹកភ្លែកបងជាអ្នកហូរ

ខំធ្វើជាមនុស្សល្អ ចុងក្រោយបងគ្មានសល់អ្វី

អុសហើយនិងធ្យូង គង់តែមានប្រៀបធៀបតម្លៃ

ទឹកចិត្តពីសង្សារស្រី មិនចង់ឲ្យអូនគិតខុសទេ។

III បើមួយនិងមួយ គិតព្រួយថាជាកំហុស

ឬជាតិនេះអូនមិនអាចខ្វះប្រុស ស៊ូរខូចឈ្មោះមិនស្មោះនឹងស្នេហ៍

ជូនពរថ្ងៃមុខ ឲ្យអូនបានសុខនឹងគេ

ធ្វើស្រូវសូមកុំភ្លេចស្រែ មិនអាចខ្វះទេ ភ្លឺជួយទប់ទឹក៕