Чӗрене хушаймӑн

Каччăсем çине пăхаттăм

Сăнаса, асăрханса.

Хама кирлĕ çын шыраттăм,

Вăхăт иртрĕ суйласа.

Ку та, вăл та юраймарĕ,

Эп тиркерĕм чăнласах.

- Тиркекен çынна çил хирĕç,-

Тенĕ мĕн авалтанах.

Чĕрене хушаймăн

Вăйпа юраттараймăн.

Турă çырни, турă пÿрни

Вăхăт çитсен килетех.

Чĕререн савсассăн,

Чунпа кăмăлласассăн,

Ĕмĕтленсе пурăнсассăн

Телею сан çитетех.

Сеп-сенкер куçсем хĕм сапрĕç,

Ай, çунтарчĕç чунăма.

Ман хăраххăм, пит тиркерĕ,

Кулса иртрĕ çеç умран.

Миçе çул çаплах шыратăп

Чуна çывăх çыннăма.

Шырасан, çавах тупайăп

Савнă çыннăм – тусăма.

Чĕрене хушаймăн

Вăйпа юраттараймăн.

Турă çырни, турă пÿрни

Вăхăт çитсен килетех.

Чĕререн савсассăн,

Чунпа кăмăлласассăн,

Ĕмĕтленсе пурăнсассăн

Телею сан çитетех.