مونولوج

ناس بحياتي لغيت

بس مضرَّتهُم جنيت

حرام إنحسبوا عليَّة

بس سهلة حسوي آبديت

هواية علىٰ نفسي إجيت

الگلب فاض و إكتفيت

بكلُشي مُعتدل و أسامح و اعدِّي

لكن عدىٰ بعزَّة نفسي طغيت

بكومة قَشْ صرنا ندوُّر الأصيل

المروَّة شَحَّتْ زادَ نُكْران الجَّميل

دومنا جاهزين وين ما حتميل نميل

لربي القريب و بأعدائي كفيل

نفَّضت روحي من زيف الخداع

حبيع المُزيّف حتى لو ما باع

حتى لو ديرحّب حنطيه الوداع

مَتشرّفني الگعدة طز بالإجتماع

تركوني و أخذني الرُّوجْ

وحدي أصارع بالموج

العرض تحوَّل مونولوج

جُنْدِي بالجَّبهة وحيد

تخلىَّٰ عَنَّه الفوج

أسگيهُم و الشَّهَد زُلال

عطشت و شربوني رِمال

خَوَنَة بوقت القتال

اللدغة من الغريب صح توجع

و الصَّاحب من يلدغ كتَّال

حياية يمِّي ، تارسة حِلمي

بالمنام جاية رايدة سَمِّي

خايفة منِّي لا تقرُّب يمِّي

رايدة تصبلي كوس بيها دمِّي

الرؤيا تشرح منو ذني

ادير بظهري فيقربن عنِّي

دست رگابهن جوة رجلي

لازم بروسهن أذبح و اسمِّي

الِّي يخذل بالنهاية

مو صديق من البداية

حذر مرَّة من عَدوِّي

و ألف مرَّة من الوياية

لأن الغدرة جاية جاية

سلاح الجَّبان الوِشاية

سَبْع و صعب يخاوي نثايا

ما نتشابه عالمرايا

الطَّيبين ما جمعتم صدفة

بس ربَّك يجمع البشر عالنَّوايا

كُل يوم صدمة

من الصَّدمات الگلب يقوىٰ

اضرب و اجمع محد يسوىٰ

الوحدة نسَّتني عندي أُخوة

مواقف ربعي بيها نون النِّسوة

و ليش آني أستغرُب ؟؟

و أجمع و أضرُب ؟

صاحب المصلحة كالمال الحرام

بالهبَّة يطير لأن عُمره ما دام

النَّاس من بعيد أحلىٰ من غير ما اگوم

تقل الجودة كُل ما أسوي زوم

قدَّرت ناس ما إلهُم لزوم

حجَّمت كُل واحد فبانوا خصوم

راجعت الشريط و عدته عالبطيء

طلع القنديل سام لكن وجهه مُضيء

بوصلتي الأُصول و مشِّيتها عالميل

الوفاء طريق و الِّي مرّوه قليل

حياية يمِّي ، تارسة حِلمي

بالمنام جاية رايدة سَمِّي

خايفة منِّي لا تقرُّب يمِّي

رايدة تصبلي كوس بيها دمِّي

الرؤيا تشرح منو ذني

ادير بظهري فيقربن عنِّي

دست رگابهن جوة رجلي

لازم بروسهن أذبح و اسمِّي