حاظن صورتك

وينك رحت واني انتظر....كاسرلي گلبي اشچم كسر.

عايفني حاضن صورتك.......يل حاضن  اتراب   الگبر.

وينك رحت مني غفل..........واني اعلى بابك منشتل.

لو أدري ويجيبك دمع........غير  ابچي   بفراگك عمر.

واني ادري الاتراب......ميرد الأحباب.

ياجرح الافراگ۔۔۔۔..۔ينزف ولاطاب..

استعجلت حيل...عايفني بالويل.

كلما يجي الليل...يذبحني  الاغياب.

امر الله صار ومقتنع.......بس والله گلبي منفطر.

عايفني حاضن صورتك..يل حاضن اتراب الگبر.

اتذكر ارسومك وأون...........ماظل إلي غير الحزن.

ماغافي بعدك چن طفل...........مانام  اذا  ماأنحظن.

عالذكرى عايش وارتجي...كل ساعة اگولن ها يجي.

ماچنت احسبك يالگمر.........تترك سماك وتندفن...

مثل الظلم عاش بسجن

وأبچي ابلياك...........ماأگدر أنساك.

من بالي متغيب......وأتأمل ألگاك.

موبيدي وشلون...ماظلت اعيون.

كون اليدفنون.....دفنوني وياك.

مودمعي بغيابك نزل..تارك أثر فوگ الوجن.

ماغافي بعدك چن طفل....مانام اذا ماأنحظن.

وينك تعبت من القهر...........وعيوني أذاها السهر..

هستوني حسيت ابعطش..چنت بحياتي انت النهر.

بعدك حلو بعمر الورد............ماچنت أضنك تبتعد.

چتف و علي چنت استند...ميعوضة كل هاي البشر.

متعذب هواي.......شيفضها بلواي.

غمضت الاعيون....واتخيلك جاي.

واني ادري متعود...شيردك اردود.

بس تبقى موجود...كل لحظة ويياي.

من فرگتك حيلي انتهى..واگليبي حسيتة انعصر.

هستوني حسيت ابعطش..چنت بحياتي انت النهر