Зөләйха турында хикәят

Колак салып тыңлагыз сез ошбу сүзне,

Ул Зөләйха—мәликзадә, Таймус кызы,

Тулган айдай балкыр иде аның йөзе,—

Оҗмахтагы хур кызына охшый имди.

Таймус Мәгъриб җирләрендә патша иде,

Гаскәрләре йөз мең ирдән аша иде,

Күк иясе аңа бик зур байлык бирде,—

Дөньяда ул олуг мәлик булган имди.

Аның милке дөнья малы белән тулган,

Һәрвакытта үзе ул потка табынган,

Аның Зөләйха исемле кызы булган,

Бу хәлләрнең асылын аңлагыз имди.

Ул Зөләйха мәлик Таймус кызы иде,

Ястыгы шул атасының тезе иде,

Бер көн Йосыф сурәтен ул төштә күрде,—

Аны чын дип аңлаган һәм белгән имди.