Ҳтәыла абираҟқәа

Уеибамган, уҭымҟьан, ақәылаҩ ихҿа,

Иануп ажәытәтәи ҳбираҟ амаҿа:

Иеизыразызааит ауаа рнапқәа!

Иеизыразызааит ауаа рыгәқәа!

Згәашәаҿ иаҳԥыло – ҳгәашә узаркым

Абар, ҳа ҳнапаҵа – абџьар акым!

Абар, ҳара ҳамчра, ҳаразра абар!

Гәыкала иаҳзыҟоу иуԥаҳгылом ар!..

Ҳтәыла абираҟқәа – ҳанацәа ирсыз!

Ргарашәа иациз! Рнапы разқәа зхьысыз! –

Ҳтәыла абираҟқәа – азгәышьуамызт ахҿа –

Ҩ-сахьак рнын урҭ:

Амра, Амаҿа!

Ахьӡ-аԥша шәымазааит ҳбираҟқәа ԥхьа изгоз,

Аԥшқа икыкахш ицәмырӡкәа дзыхьчоз!

Шәынаур ԥшьақәа ҳацуп ҳара,

Иақәым ишәзыркыз ахаҵа-шәа ԥсра!

Бныҳәазааит Ан, афырхацәа зыхшаз,

Быԥсадгьыл аҵеицәа рыла блашаз!

Абиԥарақәа шәымца мыцәо ирзакуп,

Ҳтәыла наӡаӡа шәныҳәаҿа акуп!

Хашҭра шәықәымзааит ҳбираҟқәа ԥхьа изгоз!

Ҳаԥсадгьыл аҳәаақәа –

Мырӡуа изыхьчоз!

Шәымра-шәфырхаҵароуп ҳара иаҳзыԥхо,

Шьыжь шәаԥшь бахәаԥшь анаҿаԥхо!

Ҳтәыла абираҟқәа – ҳанацәа ирсыз!

Ргарашәа иациз! Рнапы разқәа зхьысыз! –

Ҳтәыла абираҟқәа – азгәышьуамызт ахҿа –

Ҩ-сахьак рнын урҭ:

Амра, Амаҿа!