Lyrics
نبی کا شاہیں ہوں میرے مولا تو مجھکو اونچی اڑان دے دے
میرے عزائم کو میرے مولا تو رفعتِ آسمان دے دے
طویل رستہ ہے میرے مولا کہ میری منزل بھی دُور ہے جو
میں تھک نہ جاؤں مجھے اے مولا تو حوصلہِ چٹان دے دے
ہوا مخالف چلے کبھی جو تو میری کشتی نہ رُکنے پائے
جو میری کشتی سنبھالے مولا اسے تو وہ بادبان دے دے
بھٹک سکوں نہ میں راہِ حق سے ڈٹا رہوں میں ہمیشہ حق پہ
جو نور سے بھر دے میرے دل کو مجھے وہ نورِ قرآن دے دے
مجھے تو داعی بنا دے حق کا زباں میں تاثیر دے اے مولا
دلوں میں اترے جو میرے مولا مجھے وہ طرز بیان دے دے
نہ بک سکوں جُھک سکوں نہ ہرگز کسی کے آگے اے میرے مولا
تو مجھکو ایسا یقین دے دے تو مجھکو ایسا ایمان دے دے
جو بُوٹے پالے ہیں میں نے مولا لہو جگر کا بہا بہا کر
تو ان پہ اب گل کھلا کے مولا بہ شکل اک گلستان دے دے
لہو سے سینچے اسے ہمیشہ لہو کے قطرے گرا گرا کر
میرے نبی کے چمن کو مولا تو ایسا اک باغبان دے دے
میں تیری راہ میں مروں تو ایسے کہ مر کے زندہ رہوں ہمیشہ
پیوں شہادت کا جام مولا تو زندگی جاودان دے دے
میری تو اوقات کچھ نہیں ہے تیری تو رحمت مگر وسیع ہے
میں ایک ذرہِ خاک مانگوں تو مجھکو سارا جہان دے دے
اے میرے مولا میں ہوں حِجازی تمہارے دین کا میں زخمی غازی
جو بن سکیں ترجماں میرے ایسے ہمسفر رازدان دے دے
Written by: Waseem Hijazi
