شخص ما

شَخص مَا

صَحَّيَ إِحسَاس فِيَّا كُنت ملَـجِّمَاه

حَرَّك القَلب اللِي كُنت محَجِّمَاه

فِي الحَياة دِي وجُودُه كَان فَارِق كِتير

وَأنَا فُوق النَّاس بحَالها منَجِّمَاه

كُلّ حَرف في إسمُه لَحن منَغَّمَاه

عُمري مَابينُه و مَا بِيني مقَسِّمَاه

وأنَا قُدَّام المَحَبِّة اللي فِي عِينيه

ألف عَربُون للمَحَبَّة مقَدِّمَاه

شَخص مَا

جِه فثَواني بكِلمة عَ السَّهَر غَواني

جِه دَاوَانِي بلَمسَة و بهَمسَة اِحتَواني

حُضنُه بِيت مَـفـتوحلِي دفَّاني وآوَاني

وَأنَا بَختِي أبقيَ فرِعَايتُه وفحِمَاه

شَخص مَا

اللِي بِيه مِية حَاجَة حِلوَة مجَمَّعَاني

و اللِي فِيه حَنَان يِريَّح لَمَّا أعَاني

بِين إيدِيه إحسَاسي بِيكَمِّل معَاني

وحُبِّي لِيه بكُلّ اللُّغَات مِتَرجِمَاه

شَخص مَا

كَان نَصِيب جَايِز ويمكِن رُبَّمَا

صُدفَة حِلوَة عَليَّا أنَا الهَوَي رَمَاه

كَان هِدِيَّة مِن السَّمَا و لو بَعد إِيه

مش هَسِيبهَا فيُوم تروح وَالله فسَمَاه

اللي بَسرَح لَمَّا بَبقَيَ مِكَلِّمَاه

اللي قلبي فحبّه رُحت مِسَلِّمَاه

واللي لو تَاه مِنِّي حَتى بِين أُلوف

بِالبرَاءَة اللي فسَلامُه مِعَلِّمَاه

شَخص مَا

جِه فثَواني بكِلمة عَ السَّهَر غَواني

جِه دَاوَانِي بلَمسَة و بهَمسَة اِحتَواني

حُضنُه بِيت مَفتوحلِي دفَّاني وآوَاني

وَأنَا بَختِي أبقيَ فرِعَايتُه و فحِمَاه

شَخص مَا

اللِي بِيه مِية حَاجَة حِلوَة مجَمَّعَاني

و اللِي فِيه حَنَان يِريَّح لَمَّا أعَاني

بِين إيدِيه إحسَاسي بِيكَمِّل معَاني

و حُبِّي لِيه بكُلّ اللُّغَات مِتَرجمَاه