قول أحبك

صبّ صوتك مع القهوه وصوتك كفيل

يسعد الناس ، ويصفّي مزاجاتها

لاحكيت احرج الممكن مع المستحيل

‏اسقني روعـة حروفك و كلماتها

قول : احبك ، وأدلّ الدرب وألقى الدليل

وكل كلمه تلاطَف نطقها .. هاتها

قولها لايصير الليل دمه ثقيل

وعلّم عيونك تبطّل حركاتها

لاتظلل دروبي وانت رمشك ظليل

توّهتني عيونك في متاهاتها

والله اني قبل لااعرفك بالي طويل

تارك النفس تمشي حسب مشهاتها

لاطمعت بكثير ولاجزعت بقليل

ولاتكلّمت عن نفسي وحاجاتها

لين ماجيت يمي بأمر (دُّبر بــ ليل)

رزق والناس تُرزق مثل نيّاتها

خلني بين ابو شامه وطرفٍ كحيل

في نعيم الحياه وفي ملذاتها

سوّ فيني جميله دام وجهك جميل

لاتخلّيني لبقعا وصكّاتها