Миңә Һине Оноторға Кәрәк

Миңә һине оноторға кәрәк,

Үткәндәрҙе ҡат-ҡат иҫләмәҫкә

Тик нисек һуң, ҡайҙан көс табырға?

Осрашыуҙар ҡабат эҙләмәҫкә.

Миңә һине оноторға кәрәк,

Берҙән- берем тиеп табынмаҫҡа.

Тик нисек һуң, ҡайҙан көс табырға?

Ҡараштарың һинең Һағынмаҫҡа.

Онотор ҙа инем бәлки һине,

Аймылышта итеп юлыбыҙҙы.

Ғүмерҙәрҙән әгәр юйып булһа,

Беҙҙе осраштырған йылыбыҙҙы.

Миңә һине оноторға кәрәк

Буш хыялдар менән йыуанмаҫҡа.

Тик нисек һуң, ҡайҙан көс табырға?

Осрашҡанда һине, ҡыуанмаҫҡа

Миңә һине оноторға кәрәк

Үткәндәрҙе ҡат- ҡат иҫләмәҫкә.

Тик нисек һуң, ҡайҙан көс табырға?

Осрашыуҙар тағы эҙләмәҫкә.