បងបានឃើញស្រីល្អ ស្អាតដូចកិន្នរ ពីសួគ៌ាអឺយ

បងបានឃើញស្រីល្អ ស្អាតដូចកិន្នរ ពីសួគ៌ា

កើតក្តីប្រតិព័ទ្ធ ឥតគណនា

ចងបានពុំងា មករួមប្រាណ

លោកតាខ្ញុំផ្តាំថា បើអ្នកឯណា ដោះប្រស្នាអឺបានអឺយ

លោកតាខ្ញុំផ្តាំថា បើអ្នកឯណា ដោះប្រស្នាអឺបានអឺយ

នោះទើបឱ្យខ្ញុំ ប្រគល់អឺប្រាណ

បងអាចដោះបាន សួរមកចុះអូនអឺយ

សូមប្រុសបងចាំស្តាប់ ស្រីសួរប្រុសចំណាប់

ស្រស់ត្រាណអឺត្រើយអឺយ

សូមប្រុសបងចាំស្តាប់ ស្រីសួរប្រុសចំណាប់

ស្រស់ត្រាណត្រើយ

ហែលទឹកដាំដូងបាន តើហៅសត្វអឺអ្វី?

សូមប្រុសលកលៃ ឆ្លើយប្រាប់អឺផង

បងសូមឆ្លើយប្រាប់ពុំងា

សត្វនោះគឺសត្វទា ណានួនអឺល្អងអឺយ

បងសូមឆ្លើយប្រាប់ពុំងា

សត្វនោះគឺសត្វទា ណានួនល្អង

ទាល់តែឈ្មោលដេញញី ណាទងវង

ទើបហែលដាំដូងផង ណាអូនស្រី

ប្រុសបងឆ្លើយត្រូវហើយ តែកុំអាលអរឡើយ

ណា ចអឺរណៃអឺយ

ប្រុសបងឆ្លើយត្រូវហើយ តែកុំអាលអរឡើយ

ណា ចអឺរណៃ

ចុះផ្លែអ្វីទុំក្រហម ស្វិតក្រៀមក៏មានអឺតម្លៃ

សូមអ្នកស្រដី ឱ្យឆាប់អឺការ

ផ្លែនោះហៅផ្លែទន្លាប់ រៀមសូមឆ្លើយប្រាប់ កែវកន្និដ្ឋាអឺយ

ផ្លែនោះហៅផ្លែទន្លាប់ រៀមសូមឆ្លើយប្រាប់ កែវកន្និដ្ឋា

ផ្លែវាទុំក្រហមដូចផ្ពាល់ជីវ៉ា

កំពុងពេញស្នេហា មករកអឺខ្ញុំ

ដូច្នេះខ្ញុំសួរទៅទៀត សូមប្រុសអ្នកឆ្លៀត ឆ្លើយឱ្យអឺសមអឺយ

ដូច្នេះខ្ញុំសួរទៅទៀត សូមប្រុសអ្នកឆ្លៀត ឆ្លើយឱ្យសម

ផ្លែអ្វីដុះទងតែមួយ ឆ្លើយប្រាប់អឺខ្ញុំ

ឆ្លើយប្រាប់ឱ្យសម កុំផ្តេសផ្តាស

ផ្លែនោះគឺផ្លែចេកអឺ ស្រីស្រស់ល្អឯក ស្តាប់ឱ្យអឺច្បាស់អឺយ

ផ្លែនោះគឺផ្លែចេក ស្រីស្រស់ល្អឯក ស្តាប់ឱ្យច្បាស់

អូនចូលចិត្តចេកឫ? បានប្រឹងសួរណាស់

បើចូលចិត្តប្រាប់ឱ្យច្បាស់ បងរកឱ្យស្រីបាន

ចុះអ្វីទៅព្រាននារី ពាក្យនេះមកពីទី ណាប្រុសអឺប្រាណអឺយ

ចុះអ្វីទៅព្រាននារី ពាក្យនេះមកពីទី ណាប្រុសប្រាណ

សូមអ្នកលកលៃ ឆ្លើយឱ្យអឺបាន

បើអ្នកឆ្លើយមិនបាន កុំរស់ធ្ងន់ផែនដី

ពាក្យថាព្រាននារី ពាក្យនេះមកពី នារីស្រីអឺយ

ពាក្យថាព្រាននារី ពាក្យនេះមកពី នារីស្រី

ធ្វើឱ្យបងក្លាយខ្លួន ជាព្រានណាថ្លៃ

ចង់បាននារីស្រី ជាគូស្នេហ៍