لحون السحابة

‏ على لحون السحابة مال غصنٍ رطيب

واهتز دمع العيون من اللقى والبعاد

ضلوعي اللي جعلها الشوق مثل اللهيب

عرضتها للهبوب .. وحولتها رمااااد

ياليت بعض المشاعر تصرف من الطبيب

ماكان ذقنا الوجع والظلم والاضطهاد

وياليت عندي مناعة للهوى والنصيب

ومشاعر كل مافارقت صارت جماد

ربيع عمري ترا لازلت اشوفك قريب

اقرب من رموش عيني للسهر والسهاد

احبك من الشباب الين وقت المشيب

واعشقك عشق الطفوله للبكى والعناد

واهيم بك فالفياض وفي فضاي الرحيب

ماتدري اني بعدك اهيم في كل واد

كم ليلةٍ جيت فيك ورحت منك غريب

ياشين طعم التغّرب في ربوع البلاد

والله ماشافت عيوني بعد وجهك حبيب

كنك سرقت الملامح من وجيه العباد