ريحة الغالي

اقبل الناس وهلت ريحة الغالي

والعذارى تغازلها وتباريها

كنها الشمس ماغطت بغربالي

والنقوش اتسابق فوق اياديها

لاطرت فز قلبي حتى لو سالي

واتبسّم وقلبي دوم حاويها

غرةٍ بالتعش والشعر هدّالي

كنها مزنةٍ والارض ترويها

والعيون الكحيلة يابري حالي

تحلي الكحل ما هو من يحليها

الشعر ما وصفها اول وتالي

لو اوصّف ولا جيت لمعاليها

فارقه عن جميع الناس بالعالي

واثقه بالجمال اللي محليها

عندها كل طاري زين يطرالي

والطواري تحب اطري طواريها

ما ابي الناس لو هي كانت قبالي

ودنيتي دونها والله ما ابيها

لا لفت والله ان فال السعد فالي

الله لعيني ولقلبي يخليها

بنت شيخٍ على الصعبات متعالي

زعّل الكون كله بس يرضيها

القصايد بها بالحيل تحلالي

والمعاني قليلة ما توفيها

كل عذرى ليا منها تهيالي

بالوصايف تراها عند رجليها