Jaago Mohan Pyaare

Jaago Mohan Pyaare

Jai Maa Saraswati par mera bhagwan se vishwas uthta jaa raha hai

Mera gumaan lut'ta jaa raha hai

Mera swabhiman toot'ta jaa raha hai

Maine jinko bhi apna banane ki koshish ki

Vo sab kuch apna chura ke chale gaye

Jo bhi sapna ugaane ki koshish ki

Buniyaad ke beej bhulane pade hain

To main kaise maan lu tere pyaar mein

Matlab ki milawat nahi hai

Barson se chalta aa raha pyaar ek dhokha hai

Bas teri sajawat nayi hai

Aur main mooh pe thukra dunga vo har ek pyaar

Jisme koi bagawat nahi hai

Aur mere purkhon ke kasht hain mere kandhon par

Koi thakawat nahi hai

Main naukri karke paisa kama ke paisa kala pe laga raha hu

Mera saara astitva tere aaj ke samaaj pe thookta hai

Mere sangharsh ka putla tere ahankaar pe moot'ta hai

Mera banaya jhooth tere dikhaye sach se joojhta hai

Mere marne ke baad mujhe mitane ki teri har koshish meri jeet hogi

Mere marne ke baad koi aur kalakaar ayega aur yeh tragedy repeat hogi

Defeat hogi teri jab tu mere jaison ko zinda maarna chahega

Kagaz ke bashinde ko koi bhi darinda maar na payega

Main pariwaar se mile har dutkaar ka khanjar

Seene mein gadaye chalta hu

Self doubt ke gaddhe mein girta hu

Kala ke nashe mein ladkhadaye chalta hu

Tum mujhe dekh ke keh hi nahi sakte

Mujhe khudpe vishwas nahi hai

Mera jeevan jeena safal hoga

Mujhe iski koi bhi aas nahi hai

Mujhpe bin matlab ke kyu mohabbat nawazi jayegi

Kamane mein, seena jalane mein, jawani jayegi

Main haare huon ka messiah, kitnon ka malaal ban jaunga

Chhote bhaiyon ki seedhi, bade bhaiyon ki dhaal ban jaunga

Kisi ke liye pyaar to bakiyon ke liye sawaal ban jaunga

Main jeete jee kuchh na ban paya to marne ke baad misaal ban jaunga