Vesna Vulovic

Tren batek

beste tren bat ezkutatu

dezakeela dio

emakume ahots batek.

Bat bakarra

balitz gaitzerdi,

erantzuten diozu zuk

inork entzun ez arren.

Bide erdian edo erdibidean,

denbora begi ertzetako

zimurretan barna.

Dekadentziaren sintoma

ugariak, ugariak eta gainera,

ageriak.

Ez, ez zara Vesna Vulovic,

baina zuk ere bildu dituzu

galantak bizi honetan.

Erori, jaiki eta aurrera segi,

estropezuak ere pausoak ziren finean.

Bigarren edo auskalogarren

aukeran bizi zarela

ondotxo dakizu.

Biziraun duzu onean,

biziraun duzu txarrean,

biziraun desastrean.

Ustekabeko bira dramatiko bat,

eta hara orain zer bihurtu zaren:

andre heldu bat

zoriontasunaren

erradikalizazio fasean.

Ez, ez zara Vesna Vulovic,

baina zuk ere bildu dituzu

galantak bizi honetan.

Erori, jaiki eta aurrera segi,

estropezuka ere egiten da bidea.

Gauza bat esango dizut,

pixka bat behartuz gero

beti enkajatzen du puzzleak

Eta memoria fikzioa denez,

asma ezazu bertsio on bat.

Noski, beti zeure alde.

Ez, ez zara Vesna Vulovic,

baina zuk ere bildu dituzu

galantak bizi honetan.

Erori, jaiki eta aurrera segi,

estropezuka bada ere,

honaino iritsi gara.

Ez, ez zara Vesna Vulovic,

baina zuk ere bildu dituzu

galantak bizi honetan.

Erori, jaiki eta aurrera segi,

hemendik atzera,

dena aurrera da.