Em Digenvez

Aotrou ! Prennet hoc’h eus va c’harc’har

Gant alc’hwez ar c’hleñved.

Va bac’het hoc’h eus en digenvez

Hag er boan, hag er baourentez.

Em noz teñval, em estrenvan yen

Ne ‘m eus d’am sklêrijennañ

Tra ken ‘met ar c’houlaouennig-se

O teviñ sioul em diabarzh

Ar c’houlaouennig-se bet enaouet gwechall

Ouzh flamm ho kleuzeur…

Deut zo ‘velkent ur c’hariad

D’am frealziñ gant e vezañs

Da barañ dre doull an alc’hwez

E lagad war va hini.

Ha skinañ ‘rae ‘vel un Heol

Ma sklaerias va c’harc’har,

Ma tommas va c’halon

Ma ‘n em lakis da ganañ

Da c’hortoz Heol ar Beure

Heol ar Frankiz

Peurbadel.