مكتوم نور دبي

يغيب النور يا دبي الجميلة ويبتدي بج نور ..

وأنا أعشق نورج الأول وأنا أعشق نورج الثاني

أشوف بنورج الأول ضيا مكتوم بج منثور ..

وأشوف بنورج الثاني محمد عز الأوطاني

بهم خذتي الريادة لين صرتي للفخر دستور ..

وكم خذتي نواميس الفخر في كل ميداني

نعم مكتوم ومحمد غلا في داخلي محفور ..

ما يفنى لو يقولون الغلا بين البشر فاني

………

رغم فقدي رغم صبري ورغم الخاطر المكسور ..

أسولف بك فخر يا روح شعري وعطر قيفاني

تسولف بك دبي اليوم يا ابويه فرح وسرور ..

وأنا كل ما لفت ذكرى دبي تخفف أحزاني

أشوفك في مشاعرها وكل عرقٍ نطق مشكور ..

وأنا أرسم تفاصيلك وكل ذكرى هي ألواني

بهذا اليوم ما رحت ودخلت بقلبي المعمور ..

مكانك مسكنك قلبي وحبك نبض شرياني

......

أنا روضة يا بو روضة أترجم لك بصدق شعور ..

بعض ما في أحسيسي وفي صدري ووجداني

لأنك ساكنٍ فيني مشّيد من غلاك قصور ..

ولك صورة تعيش بداخلي يا قرة أعياني

وعد كل عام أجدد لك غلا يا أعظم وفا وحضور ..

وعد كل عام أجدد لك غلا يا عمري الهاني

وتبقى ‏روضة تحيا بك فرح يا غيثها الممطور ..

وتبقى لي وطن عمري وتبقى سيد خلاني