Ya Benti

عارف انها تركتنا لحالنا أنا وإنتي

من جوا كيف حرقتنا مسحي دموعك قومي يا بنتي

تعي لعندي أغمرك وبكي على كتفي

بعرف حضني ما رح يكفي بس بركي بتروقي نتفة

دموعي كنت عم بخفي عنك والحرقة بقلبي

ابكي عليها اكتر منك كانت روحي رفيقة دربي

قربي لحضن بابا خليني شم ريحتك ما ريحتك من ريحتها وريحتها من ريحتك دخيل ريحتك

الله وحده عارف قديه انا تعبان

من وقتا ما راحت إمك وعيوني لا بترقد لا بتنام

يطلع صوت الأذان كل يوم إترحّم عليها

إبكي وصرّخ يا ريتا قبالي لإركع بوّس إجريها

ندمان على كل ثانية ما قدرت قضيتها حدا

عكل لحظة كل مرّة كنت سبب فيا بدمعة على خدها

مني طالب شي من هالدني غير شوفك عم تكبري قدامي

بيك بضهرك ما تخافي غمضي عيونك يا قلبي نامي

 

 

 

وعدي قلك يا بنتي إبقى حدّك مهما كان

لو مرّة لبابا احتجتي حضني تلاقي في الأمان

مين بعدي إلك يا بنتي يصونك من غدر الزمان

قلبي اللي جوا إنتي بيبقى مكلل بالحنان

 

من لحم كتافي بطعميكي من دمي بسقيكي

بنيابي بحميكي وبمحيلك كل اللي بيأذيكي

يا ريت فيني خبيكي بعيوني إلي وحدي

حطك بقلبي خليكي جوا مع روحي تتّحدي

ما إنتي كل اللي فاضلّي إمك خلص راحت

رفيقة عمري راحت طلعت لفوق عند ربها رتاحت

خسرت أغلى ما عندي الباقي غالي هو إنتي

بدي تكوني قد حالك وإفتخر فيكي يا بنتي

إفتخر بتربايتك مش هينة عليي كون الأب

اللي آخد دور الأم بنفس الوقت كون ليّن بالجد

ضنايي إنتي ، حياتي عمري إلك بينفنى

يا روحي أنا دموعك غالية عليي يا ضنا

اتطّلعي صوب السما ادعيلها ت الله يرحمها

صليلها واتمنيلها قصرها بالجنة ينبنا

إمك أجمل ملاك وهلق رجعت لمحلها

استغفري ربك يا بابا ودايما قولي الحمد لله

 

وعدي قلك يا بنتي إبقى حدّك مهما كان

لو مرّة لبابا احتجتي حضني تلاقي في الأمان

مين بعدي إلك يا بنتي يصونك من غدر الزمان

قلبي اللي جوا إنتي بيبقى مكلل بالحنان