So wi di Grosse

so wi di Grosse © Schmidi Schmidhauser

d‘Ching hei Grippe si chöi nid i d‘Chrippe

duss wär's schön heiss u wär weiss

wi lang si no im Bett hocke müesse

u Schliimsuppe frässe u Pingu gaffe im Fernseh vo de Aute

u warte druuf bis si gross si ändlech so gross wi di Grosse

u säuber chöi Chindswäge dür d‘Sauce stosse so wi di Grosse

 

d‘Ching hei Grippe si chöi nid i d Chrippe

si Barbie bääbele müeterle vätterle gfätterle

baggere i de Sandchäschte si tüe stritte uf‘nang umerite

enang d‘Hose abe schriisse bis si verriisse

nang gägesitig i ds Füdle biisse bis eis grännet

a d‘Mueter hanget u planget

druuf dass es gross wlrd ändlich so gross wi di Grosse

u säuber cha Chindswäge dür d‘Sauce stosse so wi di Grosse

 

d‘Ching hei Grippe si chöi nid i d‘Chrippe

drbi wette si scho lengschtens i d‘Schuel gah

gah Nasepögge grüble a d Stueubei chläbe

a d‘Sprossewänd hange uf Pouse plange

sech d Chnöi ufribsche ar Chlätterstange u si plange

druuf dass si gross si ändlech so gross wi di Grosse

u säuber chöi Chindswäge dür d‘Sauce stosse so wi di Grosse