頂真的人

佇我的心內 伊是頂真的人

 十幾歲去都市拍拚

 做人的師仔 一工當作兩工

 毋甘去𨑨迌 欲做家己的頭家

 聽袂著海湧的聲

 佇天光的時陣

 想欲問風佗位去

 𤆬阮鬥陣

 雖然冊無讀懸嘛無好額

 相信一枝草有一點露

 照顧規家伙仔 平安順遂

 幻幻的路燈 看顧咱的眠夢

 天猶袂光著爬起床

 燒餅佮豆奶閣配兩粒卵

 路邊食早頓簡單煞真快樂

 心內蹛著一个囡仔

 有烏甪甪的目睭

 親像山頂的火金姑

 閃閃爍爍

 年歲一冬一冬行過風霜

 毋捌袂記得 阮的笑容

 念著 心肝內的路

 月娘對樹尾溜伸頭

 圓滿的光線

 踮阮的身軀咧流

 流做一條河

 向望大海

 做頂真的人

 是你教予我

 上好的物件