白馬

冬 越過大海

季風渡來另外一種色个人

也渡來白馬

摎自家會走个火車

庄肚人看麼个都係新个

吂知白馬會帶走佢兜所有个細孲仔

也吂知毋過百年

森林會從山頂挲入佢兜个田坵

這當下

瞨目个長老用手指摸過山脈

講該山脈係盡恬盡恬个海浪

又講 發風了 愛起浪了

春 越過大海

確實係起浪了

深暗个山脈 天恁高逼來

日月無光

十五歲个後生仔擘開歸身目珠

烏疏滴溚裡肚相㓾

紅馬一飆上天

火灰遍野

較遠个所在天色臨暗

有人緊打語言个子彈

河壩青驚 水流結冰

頭擺 以後 所有个事情

凍成硬確確个石頭

沉落水底

夏 越過大海

到今佢兜還係毋知

柑仔花愛開該時節

仰會歸樹仔花苞變做石頭

禾仔麥仔摎包粟全部冇穀

淨記得原旦望等 雷公帶雨水

嗄聽着遠遠个腳蹄

烏馬食忒月光 連等三年有日無夜

阿姆个乳菇同圳仔燥燥

無五穀 無蜜 無乳

渴人个風

還生个人迷迷痴痴

毋醒也無夢

最尾佢兜總係聽着

地泥肚飢个聲

噠 噠噠 噠

噠噠 噠 噠

噠 噠噠 噠

噠噠 噠 噠