Si Dumani Ia Murissi

Si dumani ia murìssi e lu ciatu mi mancàssi A li orbi ia lassàssi li ma occhi cilistìni A 'sti povìri mischini ca nun vìrinu luntanu E la vita, cu li propi manu, so si carzariaru Si dumani ia murìssi e lu cori mi scattàssi Li ma vricchi ia lassàssi a cu fa finta di 'un sintìri... A cu fa finta di 'un sintìri li supplizi e li suspira Li lamenti e li dulùra di li poviri criatura Di cu vusca picca e nenti, di cu all'estiru 'un è cuntenti Di cu partìu a sìrici anni, ie ora havi i figli 'ranni E pinsannu a la so terra dici: "Fami, 'nfernu e guerra" Si dumani ia murìssi e lu sangu si firmàssi Li ma manu ia lassàssi a cu l'havi 'ncatinati A cu furu rimuttàtti dintra un funnu di galera A cu dissi ca una sula... una è la giustizia vera Si dumani ia murìssi e la menti m'impazzissi Lu ma cori ia lassassi a cu è tristi e scunsulatu... A cu ha statu abbannunàtu, comu Cristu martiddiatu Senza cruci, senza storia, senza la divina gloria Si dumani ia murìssi e lu munnu mi scurdàssi La mia anima ia affidàssi all'amuri ca 'un canuscìvu All'amuri ca pi sempri, sempri persu iu cridìu E cu spiranza e frevi ncori, nuccintuzzu ia chiancìvu