Manyan Mata Song

Eh, manyan mata ni tamburanku a yanzu nake daka

Ku ko 'yan mata aikinku yau bai wucce riƙe jaka

Duniya daɗi na lura babu kamar ku uwa uba

Haka ne yassa nai muku 'yar tsarabarku ku rarraba

Yanzu ni waƙa nake yi, wasu su ji su faɗɗi ta yi

A faɗin Hausa kama da wane ba ta zama wane ba

Ɗinkin hannu idan ka ba ni ba zan iya yin shi ba

A cikin waƙa ta mata, godiya zan wa uwata

Komai za nai, ni na sani ba za na biya ki ba

Allah sarki Ya ja da ranki, akwai kallo gaba

Wataran, ba wataran ba, laifukana na yi tuba

Ita ƙasaita tilas a ƙyalewa giwa ta yi

Mai ciki ko babu naƙuda an san ta laulayi

Mai daka zai nemi turmi, fito ruwa sai da komi

Ance kanwa uwar gami ce ban musa haka ba

Gashin tsire shi ba a yinsa idan ba tukkuba

Jini na can a kwata, yin fawa sai mahauta

Tunani daban da naku idan na yi nazzari

Hanyar jirgi daban da mota fannin sufuri

Tunda ba a ado da yana, shinge kare gidana

Ana kallo yau kallabi shi ke jan rawwani

Cutar mutuwa sai haƙuri ba ta jin magani

Lissafi sai kwakwalwa, ga Salwa ga Makwarwa

Ko ba yanka kifi ana iya kamawa a ci

Shi agogo a kan saka hannu domin lokaci

Sammako ke sanya sauri, noma fari da tauri

Yanayin danshi ke sa jikin bango yai yo rima

Busa ta ƙaho da tai yawa 'yan maza sa hau tsuma

Da ganin haure katanga, an sha wahala a daga

In zan hutu na kan biɗar in yi bakin dausayi

Allah sarki tsare ni kar na yi kallon tsautsayi

Zafi ga dafin kunama, maza sun ƙwaci gulma

A buga a bari sunanki ne amara ƙirjin biki

Sai mai daraja ake faɗa wa harkar arziki

Garwashi ya ɗauki zafi, rijiyata ta yi zurfi

Mu riƙe noma rufin asiri ne gun tallaka

Mafarauci don ya kare kansa yake ɗaukar baka

Zakara in ya yi cara, ba a jin kuwwa ta kura

Kiwon shanu da karnuka ba a kai fulfulde ba

Filin dambe sai masu ƙarfi za ka gani gaba

Rannan a cikin mafarki, na ga na kayar da Gwanki

A jikin kaza da 'yan uwanta ake samun ƙuma

In ga manya su 'yan ƙanana dole su sallama

Hali ba ya kama da siffa, takalmi ya fi safa

Audiga ba suttura bace sai in an sarrafa

Nutsuwa ce za ta rarrabe mana tsaki da ƙwafa

Korama dangin su gulbi, haƙa sai da magirbi

Ita isgar Raƙumi tana sama tai nisa da ƙas

Akuya in za a mata kora ba ta gane asss

Ƙamshi ya girmi wari, ɓaure ya gaji bauri

In za a yi gaɗa, a bari sai an je dandali

Na lura baƙin jini ake gun karɓar jangali

Gatari aikinsa sara, a yawa aka samu rara

In dai ka ji Wahidi guri da akwai almajiri

Mata suke ta'ammali da siyen kayan yari

Wata ta kerewa tsara, a gurin wata ba dabara

Hadari in ya haɗo samanıya za ka ji ruggugi

Allon kallo maza na dauri su kan ce majigi

Gyaɗa ta juri ɓara, a kwashe tuwo da mara

Manyan mata dominku nai waƙar nan na fada