Main Naa Maanungi Haar (Women's Day Special)

Har roz jab koi milta hai, mujhe ek baat hi kehta hai

Kyu jeete ho, tum sapno main, aisi nahi zindagi;

Sapne toh hote hai dhuaa, khali pada hai aasaman

Kya dekhoge, wahan jaake tum, wahan milta koi nahi.

Sabke hai apne Falsafe, kuch k kitaabon main likhe

Ab sab tumpe hai thonpte, toh kya karoge wahi.

Main Naa Maanungi Haar, chahe kuch bhi karlo yaar, rahoongi main aisi hi;

Dekha main ek khwaab, use pura karna aaj, mili hai bas Ek Zindagi.

Khaali dikhti hai chahe, tumko jebe meri,

Jhankoge jab dil main itni umeede hai bhari;

Chahe kitna mushkil, kyu na lage kaarwan,

Ek na ek din, toh badlega hi ye samaa.

Paimaane sabke hote hai, hum hai khare wo khote hai,

Ye bolna dastoor hai, logon ka kab se hi;

Duniya tumne kahan dekhi hai, zaalim badi ye hoti hai,

Kho jaoge tum bheed main, ye bhi kahenge kayin.

Baaton main inki jo gaye, inki tarha hi ho gaye,

Darne lage wo raahon main, jeene lage aise hi;

Maine toh taya hai kar liya, karna hai jo dil ne kaha,

Chalne hai bas iss rah pe, manzil milegi kabhi.

Main Naa Maanungi Haar, chahe kuch bhi karlo yaar, rahoongi main aisi hi;

Dekha main ek khwaab, use pura karna aaj, mili hai bas Ek Zindagi.