Passione

Cchiù luntana me staje,

Cchiù vicino te sento

Chi sa a cchistu momento

Tu a chi pienze, che faje?

Tu m’he mise dint’e vvene,

’nu veleno ch’è ddoce…

Nun me pesa ’sta croce,

Ca je trascino pe’ tte.

Te voglio, te penzo, te chiammo,

Te veco, te sento, te sonno

è n’ anno,

Nce pienze ch’è n’ anno…

Ca ’st’ uocchie nun ponno

Cchiù pace truva’.

E cammino, cammino…

Ma nun saccio addo’ vaco…

I’ sto sempe ’mbriaco

E nun bevo maje vino.

Aggio fatto nu vuto

A Madonna d’ ’a Neve:

Si me passa ’sta freve,

Oro e pperle lle do!

Te voglio, te penzo, te chiammo,

Te veco, te sento, te sonno

è n’ anno,

Nce pienze ch’è n’ anno

Ca ’st’ uocchie nun ponno

Cchiù pace truva’.