الشوف من بعد الساعة اتنين
بيزيد ضعفين
وبتسمع أحسن من الأول
ودنك بتجيب كل التراكيب
وحاجات قدامك تتحول
ده الليل مصلحته انه يهول
ويجيبلك كام حاجة غاششها
من وحي خيالك ويسيبك
حكايات جواك كنت حايشها
هيخلى الحكايات دي تجيبك
هيخلى الحكايات دي تجيبك
هتجرب كافة الاعيبك
هتحاول تهرب هيصدك
هتغمض عينك هيجيبك
الليل شغالنته انه يخضّك
ويسيبلك بس النوم ساعتين
فتنام وتقوم وتقضي اليوم
ويجيلك بعد الساعة اتنين
