Kauna Nake Bara

Eh! Kauna nake bara ba ni dalili na tunzura

Ga shi kin ki ki yi na'am zuciya ta ki hakura

Eh! Na zata turmi kadai ke jurara yawan daka

Sai ga zuciya na duka kamar ana haka

Duk abin kasa na kaji ne za su tsattsaka

Ciwon zuciya shin me ke ba shi waraka

So rabbi ke sakawa mutum ki tuno haka

A jikin gyada ake samun mai da mutsttsika

Dutse ya yi ido inda ruwa ya bubbuka

Kauna ba ta fita ciwo ne da ke jika

Shekaru shida muna soyayya misalika

Kuma mun yi alkawar wand ana kasa tsallaka

Tunda fari maganar aure an yi da baka

Har manyanmu suka yi shaida zan yi mallaka

Sharadin da ya biyo baya na aza shi ka

Na bidar ci gaba don iliminki ya habaka

Zan iya abin da zan in kin zo da bukatuka

Ban zaton za ki gujen in kika samu daukaka

Tafiya muna ta yi sannu a sannu mu duka

Shekaru suna ta ja lokaci na ta raraka

Duk sa'anni nawa sun yi gidaje da filika

Sun aure sun aje matayensu cikin daka

Ni ina shago da 'yan kayana a daka

Ke dai nake jira kana na samu wattsaka

Diploma kin gama yadda na fara tsaruka

Daga nan za ki tsaya mu yi aure mu lulaka

Akasi nake gudu kika ce za ki dan raka

Digiri za ki yi nai uzuri zai fi saukaka

Sai na takura wa rai tunda na taka tsaunuka

Na fada na hakura zan aje 'yan sulalluka

Kun ga tashi sannu ne gamji na jure sassaka

Bege ina ta yi gun ki har ma da baituka

Wasu ma suna kiran zuciya ta ta karnuka

Ba komai kan ki nai nazari so ne ya saka

'Yan uwa sun gaji ta kai da sun fara caccaka

Ni ban matsa miki ka da rai yai ta fincika

Komai da lokaci gama surfe da sussuka

Wa'adin gama karatunki ya zo da baraka

Nisan da kin ka yo a makaranta ya farrakka

Kin dau dukkan zuga da ake miki ko nika

Shi hukuncin da kika yi ya sa rai na babbaka

Kin yada alkawar kin bar raina da cutuka

Ki tuno wahalhalun da na yo kanki ki yi nika

Lokaci guda ki ce ba ki son na ban da mafaka

Hakuri dole zan yi kaddar na ji zan rika

Amma hakkina na kanki ba ya bar ki ba