Want Fi Goh Rave

I woz Waakin doun di road road Di addah day When a hear a lickle yout-man say Him seh Y'u noh si mi situation Mi don't have noh accamadaeshan Mi haffi sign aan at di station At six in di evenin' Mi seh mi life got no meanin' Ah jus' livin' widout feelin' Still mi haffi mek a raze Kaw mi come af age An mi want fi goh rave I woz waakin doun di road Annadah day W'en ah hear annadah yout-man say Him seh Mi naw wok fi noh pittance Mi naw draw dem assistance Mi use to run a lickle rackit But wha, di police dem di stap it An ah had woz to hap it Still mi haffi mek a raze Kaw mi come af age An mi want fi goh rave I woz waakin doun di road Yet annadah day W'en ah hear annadah yout-man say Him seh Mi haffi pick a packit Tek a wallit fram a jackit Mi haffi dhu it real crabit An' if a lackit mi haffi pap it An' if a safe mi haffi crack it Ar chap it wid mi hatchit But mi haffi mek a raze Kaw mi come af age An mi want fi goh rave