U 173 (feat. Jean-Paul Poletti)

Sentu dì chì c'hè qualcosa, piattu cum'è un sicretu

Oghje in caserna di Bastia si rende onore discretu

Ùn si sente nunda in carrughju, un vechju pienghje in u caffè

Li vene qualchì ricordu, di u Centu Settanta Trè.

Eramu in li tempi negri di e più feroce battaglie

Quantu funu i giuvanotti à cascà sott'à e mitraglie

Paisani o citadini, Orsu Carlu o Dumè

Sott'à a listessa bandera di u Centu Settanta Trè

Aiò zitelli hè più chè ora a libertà si ne spenghje

Ùn sintite i mughji fora, c'hè più d'una mamma chì pienghje

Ùn hè più tempu di dorme ma quellu di fassi valè

Noi figlioli di Cirnu, di u Centu Settanta Trè

O Signore s'è tù i vedi quassù in lu to paradisu

Ùn hè mai troppu tardi pè rende qualchì surisu

À l'eroi di a nostra terra, Orsu Carlu o Dumè

Issi zitelli morti in guerra, di u Centu Settanta Trè

Ognunu s'hè scappellatu è po hanu fattu un discorsu

U più cortu chì si sia fattu, mancu una parolla di corsu

Mute eranu e vechje trombe, andati Carulu è Dumè

Ver di e silenziose tombe di u Centu Settanta Trè

S'hanu falatu a bandera, a s'hanu piegata in trè

Un suldatu a s'hà purtata, cumu pudia sapè

Ch'in celu pienghjianu l'ombre di u Centu Settanta Trè

Ch'in celu pienghjianu l'ombre di u Centu Settanta Trè