回魂

冷冷的海風 聲聲來喝醒 庄口的風獅爺

紅紅的火光 雄雄飛過了 黃昏的太武山

是啥物罪孽 是啥物冤仇 有啥人會知影

無停的戰火 無情的改變 遐濟人的運命

轉來哦 緊轉來哦

失散的囡仔 聽袂著父母 思念的叫聲

轉來哦 緊轉來哦

無停的戰火 無情的改變 遐濟人的運命

陣陣的海湧 慢慢將船隻 接引來到台西

脆脆的人命 濁濁的世情 斷送了一蕊花

是誰的保庇 是誰來顯靈 收留著伊一个

無情的時代 無奈的一切 無人知的輪迴

轉來哦 緊轉來哦

靈聖的千歲 鎮守在安西 引風牽魂飛

轉來哦 緊轉來哦

無情的時代 無奈的一切 無人知的輪迴

靜靜的等待 苦苦的安排 神明也有允准

花花的世間 茫茫的乾坤 陰陽閣再轉輪

是啥物造化 是啥物緣份 心願會當回魂

無為著怨嘆 無為著抾恨 只是為著報恩

轉來哦 緊轉來哦

無仝的身軀 仝款的身份 註好的命運

轉來哦 緊轉來哦

無為著怨嘆 無為著抾恨 只是為著報恩

無為著抾恨 只是為著報恩