Gaude plurimum

Gaude plurimum, servatoris nostri mater,

femina quae vixerunt omnium felicissima,

sola virgo prae ceteris quae

naturali partu sed conceptione caelesti

mediam divinae Trinitatis personam,

verum Deum, sempiterni Patris sempiternum Filium,

quo nos a perpetua morte servaremur,

benignius hominem edidisti.

Gaude, Maria Virgo,

divinitus hanc tibi praestitam gratiam,

ut ipsa praeter ceteras omnes

unica sis mortalis femina

quae Christum Jesum in utero gesseris,

gravida ederis,

enixa materno foveris gremio

immortalem sobolem.

Gaude, sacratissima Virgo,

illum non minus tibi quam ceteris hominibus

immortalem Filium peperisse,

qui caelica sua potestate

inferni debellavit tyrannidem,

cruentas mortis aeternae principis vires fregit,

vitamque humano generi perpetuam restituit.

Gaude, Maria, Jesu mater,

talem te genuisses Filium,

qui divina sua resurrectione

futurae nostrae in gloria resurrectionis

spem certam tradidit,

ad Deumque Patrem ascendens,

et Deus et homo, misericordia plenus

in caelum quoque reditum omnibus policetur.

Gaudemus itaque et nos omnes nobis

et tuae beatitudini, Maria, Jesu mater,

gratias habentes, gratulamur,

quae supernam adepta gratiam,

ad perennem quoque in caelum gloriam

assumpta es.

Eundem igitur Jesum tuum Filium

supplices deprecamur ut, qui indigni,

qui exaudiamur assequi non valemus,

tuis benignissimis precibus impetrare possimus

eandem tecum caelestem gloriam.

Amen.