حبة ورق

كل حاجة الفلوس، يلا بيع وإشتري

حرب دايرة بغباء والسباق إبتدا

واللي يعلى بيعلى وقوام يفتري

هو إيه اللي سود قلوبنا كده؟

دلوقتي العشرة كلام، لا عشرة إيه؟

بيقولوا هتدفع كام تتحب عليه

يتقال لك يا حبيب أخوك وتلف قوام ياكلوك

حتى التقدير يا كبير بقى دلوقتي تمنه جنيه

خلق عشان القرش إتغابوا، زي وحوش على بعض إتسابوا

وأخوة وعشرة وصحوبية، كل ده ما بنعملش حسابه

بقيت الماديات بتسوقنا، يوم عن يوم بتزود سوءنا

زي ما جينا هنطلع منها، كلنا راجعين للي خالقنا

الخير ما بقاش لسه بخيره، كله خلاص باصص على غيره

جمع كل فلوس العالم والله هيخلصوا ويطيروا

كله خلاص بقى عامل قاضي، بنقطع بعض على الفاضي

إطمع مهما هتطمع برضو إنت هتمشي وجيبك فاضي

الحكاية ببساطة شوية ورق

خلوا كل اللي فينا شوية طمع

بقيت تأذي غيرك وتقبل العرق

وتعمل بلاوي وتعمل بدع

غل وتقطيع أرحام وحنية مفيش

والناس تظلم وتنام عادي وبتعيش

وفلوس خلت الإخوات عايشين عالماديات

ومصالح خد على هات، زحمة وكله بياكل عيش

أهي دنيا وبنعافر فيها وعليها بقى مساوي وطيها

كله بيخطف عايز حتة، كله خلاص فيها لأخفيها

الناس ليه نيتهم سودة والضحكة في إيدك محسودة

اللي في قصر وعنده، وعنده يبقى باصص لك وإنت في أوضة

في ناس تقبض تمن العيبة ويقولوا عليهم كسيبة

ناس تانية في الصخر بتنحت وبتدفع عالضحكة ضريبة

ملعون القرش اللي عمانا وما خلاش جوانا أمانة

وحلال تاه في حرام والله ضايعين ربنا يتولانا