Endet

እንዴት ዐይኔን አልከልልም

እንዴት ልቤን ተው አልልም

እንዴት በቃኝ ብዬ አልምልም

እንዴት ባንቺ እኔ አልጨክንም

እየታየ እምቢታሽ ዕድሜዬን ሲያነክት

በማያረጅ ልቤ መጠበቅ አይታክት

ምን ዐይነት መፍቀድ ነው ዐቅም የሚሰባብር

አለኹ ለማትወጂኝ ተስፋዬን ስገብር

እንዴት እንዴት

እያለ በንዴት

ልቤ ሲነድ ዋለ

ተላላ እንደኔ ማን አለ

ፊት እየነሳሽኝ ልቤ አልደነደነም

ሽሽትሽ እንድቆርጥ ምክንያት አልኾነም

እወደው ሥራ ዐጣኹ አንቺን እንደመሣል

እንዴት ገዳዩ ደጅ ሰው ይመላለሳል

እንዴት እንዴት

እያለ በንዴት

ልቤ ሲነድ ዋለ

ተላላ እንደኔ ማን አለ

እንዴት ዐይኔን አልከልልም

እንዴት ልቤን ተው አልልም

እንዴት በቃኝ ብዬ አልምልም

እንዴት ባንቺ እኔ አልጨክንም

ነጻ አልወጣ አልኩ እንጂ ተስፋን ተላቅቄ

መገፋቴንማ አውቃለሁ ጠንቅቄ

መውደድ ጸጋም ቢኾን ለልብ የሚታደል

ወድጄ አስጨንቄሽ አልፈጽምም በደል

የስሜት ስካር ነው ፍቅር ሌላ ስሙ

ወድቆ መቅረት አለ ጸንቶ እንደመቆሙ

እንዴት አልጨክንም ብልም እየከፋኝ

ካጉል ተስፋ እሚያስጥል አንዳች መላ ጠፋኝ

ጠፍቼ ሞከርኩት እንዳላይሽ ምዬ

መጥቼም አየኹት ይሉኝታዬን ጥዬ

እንዳው ድካም ኾነ በተስፋ መጠውለግ

ሰላሜ አልተገኘም ቢፈለግ ቢፈለግ